Fer der Léon Werth

Ich muss die Kinner froge fer mich fergewwe fer des Buch dedikeete zu ebber Uffgwaxenes. Ich hab en ernschtliche Ausredd: der do Uffgwaxener is der bescht Freind as ich hab ennichwu. Ich hab noch en Ausredd: der do Uffgwaxener kann alles verschtehe, iewen Bicher as gmeent sin fer Kinner. Ich hab en driddi Ausredd: er wuhnt in France, wu er hungerich un kalt is. Er braucht getreescht sei. Wann all die do Ausredde net auslange, dann will ich des Buch dedikeete zu’s Kind as der do Uffgwaxener mol gwest waar. Alli Uffgwaxeni hen mol ausgschtaert as Kinner. (Awwer s’sin gans wennich vun sie as noch ebbes meinde duhn devun.) So zell ich mei Dedikeeschen verbessere wie des:

Fer der Léon Werth,
wu er mol en glenner Bu gwest waar.

I.

Wu ich mol sechs Yaahr alt waar hawwich en wunnerbaar Pickder gsehne in en Buch weeich der Tschongel, as Waahri Schtories gheesse hot. S’hot en Boa Constrictor gwisse en wild Gedier an schlucke. Do is en Kappi vun’s Pickder.
In’s Buch hot’s gsaat: “Boa Constrictors duhn die Dinger as sie nooch sin gans schlucke, unni tschaae. Nochderhand kenne sie nimmi rum muufe, un in die sechs Munet as’s sie nemmt fer Schtofft verdaue duhn sie schlofe.”
In selli Zeit hawwich ich viel driwwer gedenkt weeich Tschongel Adventures un hab’s mol endlich geduh grigt fer mei erscht Pickder draae mit en gekollerder Bensil. Mei Pickder Nummer Eens hot geguckt wie des:

Ich hab die eldre Leit mei grossi Aerwet gwisse un hab sie gfrogt eb mei Pickder sie net ungfaehr verschrocke hett.
Sie hen noh gantwatt: “Ferwas waer mer verschkaert vun en Hut?”
Was ich gedraat hab war ken Pickder vun en Hut. Es war en Pickder vun en Boa Constrictor en Elephant an verdaue. Ich hab noh die Inseit vun der Boa Constrictor gedraat so as die grosse Leit’s verschtehe hedde kennde. Sie brauche immert Schtofft ekschpleent hawwe zu sie. Mei Pickder Nummer Zwee hot geguckt wie des: 

Die grosse Leit hen mich noh aagrode fer vergesse weeich mei Pickders vun Boa Constrictors, auswendich adder inwendich, un fer mich iewe in Tschiagrafi, Histri, Rithmetic, un Grammar. Sell is ferwas ich’s noh uffgewwe hab, wu ich mol sechs Yaahr alt waar, fer en grosser Artist warre. Es hot mich sadde unnergedrickt as mei Pickders Nummer Eens un Nummer Zwee net arrich gut driwwer gange waare. Grossi Leit kenne selewe net Schtofft verschtehe bei sich selwert, un es macht Kinner mied fer Schtofft iwwer un iwwer ekschpleene zu sie.
So hawwich misse plaenne fer ebbes schunscht duh mit mei Lewe, un ich hab glannt fer Airplanes fliege. Ich bin nau pretty well alliwu rum gfloge darrich die Welt. Un es hot so ausgschafft as mei Tschiagrafi mich so zimmlich rausgholfe hot. Ich kennt China vun Arizona vunenanner saage graadeweg, witsch is rieli haendich wammer verlore watt darrich die Nacht.
So hawwich in mei Lebzeit en Latt ernschtlichi Leit aagedroffe. Ich hab aa viel Zeit gschpendt an grossi Leit rum. Ich hab sie recht neegscht aageguckt ... doch hot sell mei Opinion vun sie net en hool Latt impruuft.

Alli Mol wu ich ebber aagedroffe hab as mich etaal schmaert gedinkt hot, hawwich sie mei Pickder Nummer Eens gwisse, was ich immert ghalde hab, fer gucke was sie mache deede deweege. Ich hab gucke welle eb sie rieli ennichebbes verschtanne hedde devun. Awwer sie hen als yuscht gsaat, “Sell is en Hut.” So hawwich’s uffgewwe fer sie ennichebbes meh saage weeich Boa Constrictors adder Tschongels adder Schtanne. Ich hab mich als uff ihre Lewwel geduh un gschwetzt weeich Golf un Politics un Neckties un so Sache. Un selli grosse Leit waare als froh fer so en gscheider Tschaep kenne.

II.

So hawwich gans alleenich glebt, unni ennichebber hawwe fer rieli bsuche mit, bis ich en Crash Landing gmacht ghadde hab in die Sahara Wieschdi sechs Yaahr zrick. Ebbes in mei Intschein war kerfluie gange, un zidder as ich nimmand debei ghadde hab fer mich helfe, ken Mechanic un aa ken annri Leit as mitgfloge waare, hawwich mich reddi grigt fer’s Problem selwert taeckkle. Fer mich waar des en wichdich Ding: ich hab yuscht genung Drinkwasser ghatt fer acht Daag.
So hawwich mich anne glegt die erscht Nacht fer schlofe uff der Sand, Dausende vun Meil weg vun’s neegschdischt Land wu’s ennichi Leit ghadde hett. Ich waar meh alleenich as en gschipreckder Mann an flote uff en Raeft, mitts vun die Oschen. Du kannscht wohl denke wie verschtaunt as ich waar wu ich uffgweckt warre bin frieh marriyets bei en gschpassichi glenni Schtimm as gsaat hot: “Plies, draa mich en Pickder vun en Schippli ...
”Ei was?”
“Draa mich en Pickder vun en Schippli.”
Ich bin uffgetschumpt as wann ich gedroffe gwest waer vun Wedderleech. Ich hab mei Aage gut griwwe. Ich hab gut hiegeguckt, un hab en gschpassicher glenner Tschaep gsehne mich recht ernschtlich an aagucke. Do is’s bescht Pickder as ich’s geduh hab fer draae vun en, schpeeder aan. Uff kors, er waar en Latt besserguckich as was ich draae hab kenne. Sell is net mei Schuld. Wu ich mol sechs Yaahr alt waar hen die grosse Leit mich aagrode fer vergesse weeich Pickders peente, un ich hab glannt fer nix annerschder draae as yuscht Pickders vun Boa Constrictors, auswendich adder inwendich.

So hawwich aaghalde daer Bu aagucke mit rechdi grossi Aage. Mer soll net vergesse as ich Dausende vun Meil weg waar vun ennichwu wu’s Leit ghadde hett. Doch hot daer glee Tschaep net gsiemt verlore adder ausgfegt sei, adder an verhungere adder an verdaschde. Allemnoh waar er aa net abbaddich bang gwest. S’waar nix an en as gsaat hett, des is en glenner Bu, verlore, mitts vun die Wieschdi, Dausende vun Meil weg vun ennichwu wu’s Leit hot. Ich hab en mol endlich gfrogt:
“Was in die Welt bischt du an duh do?”
Un er hot widder gsaat, recht langsam un ernschtlich, “Plies ... draa mich en Pickder vun en Schippli.”
In so en gschpassicher Sitschieeschen dutt mer net denke weeich net hariche. So dumm wie’s geguckt hett, mit mich Dausende vun Meil weg vun ennichwu un leiebel fer umkumme, hawwich en Schtick Babier un en Pen aus mei Sack raus gnumme. Awwer noh hawwich draa gedenkt as ich’s menscht Tschiagrafi, Histri, Rithmetic, un Grammar glannt ghadde hab, un ich (bissli aus Fix) hab der glee Tschaep gsaat as ich net gwisst hab wie fer draae. Er hot noh gsaat:
“Sell macht nix aus. Draa mich ein Pickder vun en Schippli.”
Zidder as ich nie ken Schippli gedraat ghadde hab hawwich en eens vun die zwee Pickders gedraat as ich gwisst hab fer draae—’s wan vun der Boa Constrictor auswendich. Noh waar ich verschtaunt fer der glee Tschaep heere saage:
“Nee, nee! Ich will ken Elephant in en Boa Constrictor sei Bauch. En Boa Constrictor is recht gfaehrlich, un en Elephant deet in der Weg kumme. Wu ich wuhn is alles recht glee. Ich brauch en Schippli. Draa mich en Pickder vun en Schippli.”
So hawwich gschtaert draae.
Er hot’s Ding recht gut aageguckt un hot noh gsaat: “Nee! Des Ding is nau schunt arrich grank. Draa noch eens.”
Ich hab mich noh widder an’s Draae gmacht. Mei Kumraad hot mich aageguckt mit en Schmeil, awwer recht petickler:
“Du kannscht selwert sehne ... sell is ken Schippli, sell is en Bock. Er hot Hanne ...”
So hawwich en dritt Pickder gedraat, awwer der Bu hot’s aa net gut gegliche, graad wie die annre:
“Sell datt Schippli is zu alt. Ich will eens as lang lewe zellt.”

Noh hawwich—ebissel ungeduldich, mit dem as ich sadde in en Hurri waar fer schtaerde schaffe uff mei Intschein—des Pickder do gschkribbelt.
Ich hab noh gsaat:
“Sell datt is yuscht die Bax. ’S Schippli as du hawwe witt is inseit drin.”
Noh waar ich rieli verschtaunt as mei glenner Critic nau gsiemt hot gut gepliest sei:
“Sell is yuscht die Satt as ich hab welle! Meenscht du, des Schippli zellt en Latt Graas brauche?"
“Ferwa?”
“Bekaas wu ich wuhn is alles recht glee ...”
“Ich meen, es sett blendi sei. Ich hab dich en recht glee Schippli gewwe.”
Er hot noh sei Kopp iwwer’s Pickder gebickt:
“’S Ding is net gans so glee ... Guck mol! S’is eigschlofe ...”
Un sell is wie ich der glee Prins glannt hab kenne.

Antoine de Saint-Exupéry

»Der glee Prins«

Mit der Schreiwer sei eegni Pickders
Iwwersetzt aus’s Frentsche in’s Pennsylfaanisch-Deitsche vum Mark L. Louden

[Le Petit Prince – Der Kleine Prinz – The Little Prince]
Pennsyfaanisch-Deitsch – Pennsylvania Dutch – Pennsylvania German

96 Seiten
ISBN 3-937467-28-9

€ 14,95 ($18.99)

Zu Bestellen über: EDITION TINTENFASS
Neckarsteinacher Straße 7
69239 Neckarsteinach
Tel.+Fax: +49-6229-2322
http://www.verlag-tintenfass.de